[Texto en lengua achuar] Juunt naamkau piruana juuntri nunia tarimiat aints iruntraru ainia nuu penkeran chichaman ejekiar wenawai penker anturnaikiar irutkamunmasha takakmastai tusar

• • Juunt namkaru chichainiawai nekas isha yaimkatji shiram nunka Tesamu 1AB tsuwamramu tseasmakchamu ati tusar, turam aints nuni pujuiniausha penker najaimiatsuk warawarat matsamsarat tusar.
  • Juun namkaru chichainiawai nekas isha yaimkatji penker tarimiat aints tsuwakjai yayamu ati tusar.
  • Tarimiat aints iruntraru ikia juní takakmastasar inintimji tiniamtikia nusha anturkatatji turakur nii inintimaurisha juu yamai kanchin nunka tsankatkatai Tesamu 192 tusar pujaji nunisha nii itiur takakmasmi tiniawai nusha aarmau atiniuitiai.
  • Nunka kirakri ukuinmausha umiktataji mash juu chintiuk chintiuk juunt entsanam pujuinia juninkia, Loreto juuntri naamkarujai shiram chichasar.

  Juunt naamkau Loreto juuntri penker chichaman aujmatki weawai warinkesha uyumtinaksha waintsuk penker chichaman ejeki weawai mash Tarimiat aints Pastasnum, Tigriniam, Kurinum nunia marainiunam pujuinia nujai, tura nuniasha tawai wisha yaintajrume atumsha penker najaimiatsuk pujusmintrun turakrum atumi irutkamurish penker emtikiamniuram tusan.

  Yamai kintia juni Ana Jara Velasquez nekas nisha Juunt naamkau iruntrataram tamati iruntramunam, juunt nisha Juunikiaru paan chicham Tarimiat aints ainiau warí chichamnak chichamrukaria nuna yamai paan antukari, turasha warikia atsawai antsu peruana juuntri Ollanta Humala tawai yaintajrume shiram chicham iwiaramu juu matsatkamunam juwakat tusan wakerajai tawai.

  Unuimiatkau ainiaun juu chuichaman paan ujakari Tsentsepatniun juuntri nunia kuri ainiaun chichamriniu juuntri Eleodoro Mayorga naartin paan chichaman etserkayi juwaitiai iniu umiktintri ainiauka tusa nuniasha aintsan 96 petsa millones kuik tepawai   Tarimiat aints ainiau   yaintin tamau tawai.

  Aintsan tawai, yaintatji Tsuwakratin ainiausha, penkeran takakmasarat tusar, tura aintsarik Tarimiat aintsu tsuwamatirisha penker yaintatji tawai, turakur 100 mil tarimiat aints ainiau juu chintiuk chintiuk juunt entsanam pujuinia junia yaintai tusar wakeraji tawai, aintsaran juu tsuwamati ainiauka 10 petsa millones kuik enketamu aartatui tawai, tura nuniasha aintsarik tuke jistatji entsan penkernash umurminash umunia tusar tawai.

  Nuniasha aintkasrik kuik enkeaji 48 petsa millones (PNSR) tuke takakmakiar wearat 62 irutkamunam tusar. Tura yamaikikia kampatmachik irutkamu entsari iwiarturmau ainiawai tawai (Los Jardines, Nuevo Andoas nuniasha Nuevo Porvenir tawai).

  Nuniasha aintsan tawai piruana juntrissha yainmaktatrume nunka Tesamu 1AB, penker iwiaramu juwakat tusa, tura aintsan nisha nukap chichamruktatui nunka Tesamu 1AB shiram penkeran iwiarar ukukiarat tusa, nuu OEFA wainkamu ainia nuna shirman tsumwamrar ukukiarat tusar.

  Nuniasha aintsaran OEFA nunia Tarimiat aints Irumntraru ainiausha tuke wekasar jisartatui nuu nunka tsuwatmakmau a wainkamu ainia nuu shiram tsuwamramu juwakarat tusar.

  Nuniasha 3.5 petsa millones kuikian tesawaruitai nunka kirakri juu chintiuk chintiuk entsanam irutkamu pujuinia juna nunke kirakri ukuitkatnium, tura junaka Loreto juuntri  juu takatnaka umiktiniuitiai, tura juna umikiarat tusa kuikian anuntrin Ministerio de Economia y Finanza  tutai kuikianka enketatatui tawai, tura nuniasha nunka chichamrin Ministerio de Agricultura tutai nuna yaintri MINAGRI tutai yainkartatui tawai, tura aintsan yaimkatatui Kuikia pasunke Banco Interamaricano de Desarrollo tutai 6 petsaji millonesjai nusha aintsan nunka kirakri juu chintiuk chintiuk entsanam irutkamu pujuinia  juna nunke kirakri ukuitkataram tusa, nuka tuke yanchuk kuik iwiasmakmau nunka piruana nunke nekapmarum ukuitkataram tusar kuik iwiasmakmau puja nujaitumiktaram tawai.

  Nuniasha aintsarik Tarimiat aints iruntraru chichamesha enkekji juu nunka Tesamu 192 num kanchin takakmasarat tusar tsankamkatatji juninkia.

  Tura asamtai chichakir weamunam juunt nekas nisha naamkau PCM tutainiumia Dr. Julio Rojas chichak tawai juu chicham paan antuuki wea juka nekas penker chicham ejekir weamuitiai tawai  penker Tarimiat aints ainiaujisha anturnaikiar takakmasmi tamau chicham iwiarnaki weaji tawai.

  Tura asa, penker juunt unuimiaku junikiaru ainiarme nuna penker inintimtajrume tawai, atum shiram takakmakrumninkia shiram chichamsha ejeratatji tawai turakur Tarimiat aints ainiaujish penker anturnaikiatatji tawai, tura juka irunmau nukap najanawitji 86 irunmau najanawitji tawai Andoas, nunia Trompeteros, 12 de Octubre,Nauta, Iquitos nunia Lima Micha nunkanam turamu nuni juunt naamraru ainiaujisha shiram iruntraruitji tawai.

  Nuniasha aintsan tawai Tarimiat aints Iruntrarusha OEFA chicham najanamua nunaka nekas tawai tiaruitia, nekas nunkaka tsuwatmakmawitiai tiniawai, tura asamtai shiram ii nunkenka iwiaramu ati tusar wakeriniawai.

  Tura asamtai tajarme juu chicham penker iwiarnaki weana juke nukap kintia irunkir winiakur juu chichamka yamaikia penker chicham mash anturnaikiar penker ejeratai tusar pujurji tawai, Piruana juuntrijisha, aintsan Loreto Juuntrijisha nuniasha aintsarik Provincia Dateman Naamrukirijisha, nuniasha Perupetrojisha, Petroperujisha Pluspetroljaisha nunia Tarimiat aint iruntrarusha naamrukurijisha tuke irunkir wetatji tawai chicham tuu najanamuitiai tawai Resolucion Suprema Nº 119-2014-PCM tawai.

  Tuke juunt naamkaruka irutkamujinkia chichakiar weartatui tawai shiram chicham ejerar ukukmi tusar, warí kintiatik iruntratai tusar chicham najanamua nuna metek umikiartatui PCM juuntri naamrukurisha Ana Jara Velásquez nisha tuke pujutatui.

  Traducido por el Ministerio de Cultura

  Juu chichamnakan Tarimiat Aintsun chichamrin taku tawai tusar aarmawitiai.

  Lima, 05 de febrero de 2015

  Oficina Nacional de Diálogo y Sostenibilidad

  Presidencia del Consejo de Ministros

  Página Web: onds.pcm.gob.pe/

  Facebook: www.facebook.com/ONDSPCM